hairāñ nahīñ haiñ ham ki pareshāñ nahīñ haiñ ham

is par bhī shākī-e-ġham-e-daurāñ nahīñ haiñ ham

shikva zabāñ pe laa.eñ vo insāñ nahīñ haiñ ham

tere sitam-ba-ḳhair pareshāñ nahīñ haiñ ham

ḳhaak apnī ḳhāk-e-kūcha-e-jānāñ meñ jā milī

ehsānmand-e-gor-e-ġharībāñ nahīñ haiñ ham

āñkhoñ meñ ashk daaġh jigar meñ laboñ pe aah

sab kuchh hai paas be-sar-o-sāmāñ nahīñ haiñ ham

gulhā-e-ashk-e-ḳhūñ se hai dāman bharā huā

kis ne kahā ki ḳhuld-ba-dāmāñ nahīñ haiñ ham

ham se gurez ham se ye be-e.atinā.iyāñ

ai dost bul-havas kā to armāñ nahīñ haiñ ham

hasrat jo aa ga.ī vo nikal hī nahīñ sakī

vā ho sake jo 'abr' vo zindāñ nahīñ haiñ ham