āñkhoñ se pare niiñd kī raftār meñ rahnā

har pal kisī nā-dīd ke dīdār meñ rahnā

kho jaanā use dekh ke uryāñ ke safar meñ

chhūte hī use hajla-e-asrār meñ rahnā

ik ḳhvāb-e-darīda ko rag-e-harf se senā

phir le ke use kūcha-o-bāzār meñ rahnā

ḳhud apne ko hī dekh ke hairān sā honā

nargis kī tarah mausam-e-bīmār meñ rahnā

marnā yūñhī abresham-o-kam-ḳhvāb havas meñ

dam toḌ ke zinda kabhī dīvār meñ rahnā

hasrat sī liye ḳhilqat-e-ma.asūm meñ phirnā

sāzish kī tarah gardish-e-darbār meñ rahnā

hai baḳht sitāroñ kā un āñkhoñ meñ chamaknā

aur gul kā muqaddar lab-o-ruḳhsār meñ rahnā

raunaq sī liye shahar ke rastoñ par bikharnā

tanhā.ī kī sūrat dar-o-dīvār meñ rahnā

'sarmad' tapish-e-nār-e-suḳhan meñ huuñ ki mujh ko

gul kartā rahā sho.ala-o-añgār meñ rahnā