jalva-gāh-e-dil meñ marte hī añdherā ho gayā
jis meñ the jalve tire vo aa.ina kyā ho gayā
jab tasavvur ne baḌhā dī nāla-e-mauzūñ kī lai
sāz-e-be-āvāz se ik sher paidā ho gayā
najd ke hirnoñ se e.ajāz-e-mohabbat pochhiye
paḌ ga.ī jis par nigāh-e-qais lailā ho gayā
jaan de dī maiñ ne tañg aa kar vufūr-e-dard se
aaj manshā-e-jafā-e-dost puurā ho gayā
ab kahāñ māyūsiyoñ meñ zabt kī gunjā.isheñ
vo bhī kyā din the ki terā ġham gavārā ho gayā
dil khiñchā jitnā qafas meñ āshiyāne kī taraf
duur utnā hī qafas se āshiyānā ho gayā
rafta rafta ho ga.e jazb us meñ jalve saiñkaḌoñ
dil mirā 'sīmāb' tasvīr-e-sarāpā ho gayā