ḳhud uTh ke haath mere garebāñ meñ aa ga.e
shāyad qadam junūñ ke gulistāñ meñ aa ga.e
is ke sivā batā.eñ asīrī kā kyā sabab
ghabrā.e anjuman se to zindāñ meñ aa ga.e
kyā hogā chaar phūloñ se ai mausam-e-bahār
ye to hamāre gosha-e-dāmāñ meñ aa ga.e
josh-e-bahār aur ye be-iḳhtiyāriyāñ
sū-e-chaman chale the bayābāñ meñ aa ga.e
'sīmāb' kibr-o-nāz kā anjām kuchh na pūchh
sab rafta rafta gor-e-ġharībāñ meñ aa ga.e