kaun jaane kitnī baaqī kis ke paimāne meñ hai

jitnā jis kā zarf hai utnī hī mai-ḳhāne meñ hai

ye tirā ehsān hai jo tū ne apnā ġham diyā

ġham meñ Dhal jaane kī aadat tere dīvāne meñ hai

kyā mirī rusvā.iyoñ meñ terī rusvā.ī nahīñ

naam terā bhī to shāmil mere afsāne meñ hai

āñsuoñ meñ jagmagātī haiñ tirī parchhā.iyāñ

kyā charāġhāñ kā ye manzar dal ke vīrāne meñ hai

kah rahī hai mujh se 'mohan' chashm-e-sāqī baar baar

mai-kashī kā lutf pī kar hī sambhal jaane meñ hai