pattiyāñ ho ga.iiñ harī dekho

ḳhud se bāhar bhī to kabhī dekho

phir khilī kyā koī kalī dekho

shor hai kyuuñ galī galī dekho

yaad aur yaad ko bhulāne meñ

umr kī fasl kaT ga.ī dekho

maar koī shikār par niklā

dasht meñ raushnī huī dekho

raat kī raakh muñh pe mal mal kar

sub.h kitnī sañvar ga.ī dekho

sub.h kī fikr ba.ad meñ karnā

raat kitnī guzar ga.ī dekho

zindagī kis tarah tumhārī 'nizām'

uljhanoñ se ulajh ga.ī dekho