vahshat dīvāroñ meñ chunvā rakkhī hai

maiñ ne ghar meñ vus.at-e-sahrā rakkhī hai

mujh meñ saat samundar shor machāte haiñ

ek ḳhayāl ne dahshat phailā rakkhī hai

roz āñkhoñ meñ jhūTe ashk bilotā huuñ

ġham kī ek shabīh utarvā rakkhī hai

jaañ rahtī hai paper-weight ke phūloñ meñ

varna merī mez pe duniyā rakkhī hai

ḳhauf bahāna hai 'sāqī' naġhme kī laash

ek zamāne se be-pardā rakkhī hai