vo log jo zinda haiñ vo mar jā.eñge ik din
ik raat ke raahī haiñ guzar jā.eñge ik din
yuuñ dil meñ uThī lahr yuuñ āñkhoñ meñ bhare rañg
jaise mire hālāt sañvar jā.eñge ik din
dil aaj bhī jaltā hai usī tez havā meñ
ai tez havā dekh bikhar jā.eñge ik din
yuuñ hai ki ta.āqub meñ hai āsā.ish-e-duniyā
yuuñ hai ki mohabbat se mukar jā.eñge ik din
yuuñ hogā ki in āñkhoñ se aañsū na baheñge
ye chāñd sitāre bhī Thahar jā.eñge ik din
ab ghar bhī nahīñ ghar kī tamannā bhī nahīñ hai
muddat huī sochā thā ki ghar jā.eñge ik din