jo tere dil meñ hai vo baat mere dhyān meñ hai
tirī shikast tirī luknat-e-zabān meñ hai
tire visāl kī ḳhush-bū se baḌhtī jaatī hai
na jaane kaun sī dīvār darmiyān meñ hai
hameñ tabāh kiyā aab o gil kī sāzish ne
ki ek dost hamārā bhī āsmān meñ hai
magar ye log bhalā kis liye udaas hue
ye kyā tilism bahāroñ kī dāstān meñ hai
ham ahl-e-dard ko tohmat huī hai āzādī
ki saarī umr giraftār ek aan meñ hai