be-ruḳhī hī be-ruḳhī hai har taraf

bikhrī bikhrī zindagī hai har taraf

dushmanī hī dushmanī hai har taraf

aag nafrat kī lagī hai har taraf

kis ne ye jiinā ajīran kar diyā

ḳhauf dahshat sansanī hai har taraf

koī shai bhī ab nahīñ hai mashriqī

rañg sab kā maġhribī hai har taraf

baat jo dil meñ hai kah sakte nahīñ

kaisī apnī bebasī hai har taraf

aadmī meñ ādamiyat tak nahīñ

baat achchhī kaun sī hai har taraf

jis meñ 'robīna' nahīñ hai fikr-o-fan

kyā kaheñ kyā shā.irī hai har taraf