har kaThin moḌ pe bante haiñ sahāre mere
dost achchhe haiñ suno saare ke saare mere
ye alag baat ki kuchh kar nahīñ pā.eñge magar
raat kī raah to rokeñge sitāre mere
kahīñ sarsoñ kā talātum kahīñ kaahū kā sukūt
ek se ek haiñ gaañv ke nazāre mere
shab samajhtī hai mirī baat kī saarī parteñ
din pe khul hī nahīñ paate haiñ ishāre mere
ek hī tarah se jo sochte haiñ ham donoñ
ek se dard haiñ ya.anī ki tumhāre mere