jaane kis moḌ judā.ī kī ghaḌī aatī hai
hijr kī bel muñDeroñ pe chaḌhī aatī hai
kyā ḳhabar dhuup kī aadat ko bigāḌā kis ne
bin-bulā.e mere āñgan meñ chalī aatī hai
hijr meñ vasl kī bābat nahīñ sochā karte
aisā karne se mohabbat meñ kamī aatī hai
jaane kyuuñ vasl kā mausam nahīñ aane detā
jaane kyā us ke ḳhazāne meñ kamī aatī hai
dard kā koī to rishta hai qalam se 'nomān'
kuchh bhī likhtā huuñ to āñkhoñ meñ namī aatī hai