na ham ab yaad meñ us kī kabhī aañsū bahā.enge
na us ke chhoḌ jaane par kabhī ḳhud ko rulā.enge
hameñ bhī ruuTh jaane kā hunar to ḳhuub aatā hai
agar vo had se baḌh kar jān-e-jāñ ham ko satā.eñge
hameñ kab zeb detā hai ki aañsū un ko dikhlā.eñ
ham apnī dāstān-e-ġham unheñ hañs kar sunā.eñge
añdheroñ se vo Darte haiñ hameñ ma.alūm hai ye bhī
diye ham rāste meñ un ke har shab ko jalā.eñge
duā ham roz karte haiñ 'duā' par hai yaqīñ ham ko
hameñ kāmil yaqīñ hai lauT kar ik din vo ā.eñge