kājal udaas hai to haiñ be-kal sī chūḌiyāñ
tum ko bulā rahī haiñ ye chanchal sī chūḌiyāñ
sāvan kī mujh ko pyaas hai pyāsī huuñ misl ret
tujh par baras rahī haiñ ye bādal sī chūḌiyāñ
kartī haiñ ḳhuub shor na sone ye mujh ko deñ

dīvānī ho ga.ī haiñ ye pāgal sī chūḌiyāñ

dekho khanak rahī haiñ ye ḳhāmoshiyoñ meñ bhī
āñkhoñ meñ saj rahī haiñ ye jal-thal sī chūḌiyāñ
pal pal ye chhū rahī haiñ mirā jism aur badan
kartī haiñ mujh ko tañg ye sāñval sī chūḌiyāñ
ai shāh-e-dil suhāg nishānī hamārī haiñ
pyārī haiñ mujh ko jaan se purple sī chūḌiyāñ
ḳhushbū mire badan kī churātī haiñ roz-o-shab
dekho 'duā' kamāl haiñ sandal sī chūḌiyāñ