ġham ke bādal haiñ ye Dhal jā.eñge rafta rafta
diip har gaam pe jal jā.eñge rafta rafta
ābla-pā.ī hī kaafī hai tirā raḳht-e-safar
ḳhaar ḳhud gul meñ badal jā.eñge rafta rafta
tuur par aa ke zarā aap uThā.eñ to naqāb
sañg-e-dil ban ke pighal jā.eñge rafta rafta
chashm-e-sāqī se kahāñ pī hai ki gir kar na uTheñ
jaam se pī hai sambhal jā.eñge rafta rafta
na sahī vasl koī vasl kā va.ada to kare
ham to is par hī bahal jā.eñge rafta rafta