saarā aalam dhuāñ dhuāñ kyuuñ hai
har taraf aah aur fuġhāñ kyuuñ hai
band hai aaj kyā dar-e-rahmat
har duā merī rā.egāñ kyuuñ hai
pī liyā kyā sitam ne āb-e-hayāt
ḳhauf se band har zabāñ kyuuñ hai
saath chaltī hai mere har jānib
is qadar barq mehrbāñ kyuuñ hai
aa ke sāhil pe kaun Duub gayā
mauj kī har adā javāñ kyuuñ hai
jism hai ruuh mar chukī kab kī
marg pe ziist kā gumāñ kyuuñ hai
jab fanā hī nasīb hai sab kā
phir ye hañgāma-e-jahāñ kyuuñ hai