lafzoñ ke ye nagīne to nikle kamāl ke

ġhazloñ ne ḳhud pahan liye zevar ḳhayāl ke

aisā na ho gunāh kī daldal meñ jā phañsūñ

ai merī aarzū mujhe le chal sambhāl ke

pichhle janm kī gāḌhī kamā.ī hai zindagī

saudā jo karnā karnā bahut dekh-bhāl ke

mausam haiñ do hī ishq ke sūrat koī bhī ho

haiñ us ke paas aa.ine hijr-o-visāl ke

ab kyā hai arth-hīn sī pustak hai zindagī

jīvan se le gayā vo ka.ī din nikāl ke

yuuñ zindagī se kaTtā rahā juḌtā bhī rahā

bachcha khelā.e jaise koī maañ uchhāl ke

ye taaj ye ajantā elora ke shāhkār

afsāne se likhe haiñ urūj-o-zavāl ke