yuuñ bhī hone kā patā dete haiñ
apnī zanjīr hilā dete haiñ
pahle har baat pe ham sochte the
ab faqat haath uThā dete haiñ
qāfila aaj kahāñ Thahregā
kyā ḳhabar ābla-pā dete haiñ
ba.az-auqāt havā ke jhoñke
lau charāġhoñ kī baḌhā dete haiñ
dil meñ jab baat nahīñ rah saktī
kisī patthar ko sunā dete haiñ
ek dīvār uThāne ke liye
ek dīvār girā dete haiñ
sochte haiñ sar-e-sāhil 'bāqī'
ye samundar hameñ kyā dete haiñ