tujh se bhī hasīñ hai tire afkār kā rishta
tū maañg le mujh se mire ash.ār kā rishta
vo dhuup meñ nikhrā huā billor sā paikar
chāñdī sā chamaktā huā dīdār kā rishta
tanhā.ī meñ pahuñche to sabhī the tahī-dāmāñ
bāzār meñ chhoḌ aa.e the bāzār kā rishta
ik aur girah saañs kī Dorī meñ paḌegī
yaad aayā mujhe bhūlā huā pyaar kā rishta
afkār ke jañgal meñ khaḌā soch rahā huuñ
kis tarah ma.ānī se ho iz.hār kā rishta
kyuuñ yaad dilāte ho 'rashīd' un ko ye bandhan
ab kaun nibhātā hai ye bekār kā rishta