bahāroñ ko chaman yaad aa gayā hai

mujhe vo gul-badan yaad aa gayā hai

lachaktī shāḳh ne jab sar uThāyā

kisī kā bāñkpan yaad aa gayā hai

mirī ḳhāmoshiyoñ par hañsne vaalo

mujhe vo kam-suḳhan yaad aa gayā hai

tumheñ mil kar to ai yazdāñ-parasto

ġhurūr-e-ahraman yaad aa gayā hai

tirī sūrat ko jab dekhā hai maiñ ne

urūj-e-fikr-o-fan yaad aa gayā hai

kisī kā ḳhūb-sūrat sher sun kar

tirā lutf-e-suḳhan yaad aa gayā hai

mile vo ajnabī ban kar to 'rif.at'

zamāne kā chalan yaad aa gayā hai