ham qalandar haiñ hameñ aatā hai faaqa karnā
ham ne sīkhā hī nahīñ koī tamāsha karnā
rāz-dāñ ban ke raho kuchh to salīqe sīkho
raaz par itnā bhī mushkil nahīñ parda karnā
yuuñ hī dekhā hai ka.ī baar tirī mahfil meñ
kitnā āsāñ hai kisī shaḳhs ko rusvā karnā
yaad hai ḳhuub mujhe mere liye rab ke huzūr
maañ kā ro ro ke duā karnā vo sajda karnā
āñsuoñ ko kabhī girne na diyā palkoñ se
mujh ko aayā hī nahīñ pyaar ko rusvā karnā
ishq ye kaun sī manzil pe mujhe le aayā
aa.ina sāmne rakhnā tujhe sochā karnā
apne ajdād se sāhil ye hunar aayā hai
rāh-e-haq meñ na kabhī jaan kī parvā karnā