koī bhī armān nahīñ hai
yuuñ jiinā āsān nahīñ hai
aaheñ andar ghuT jaatī haiñ
dil meñ raushan-dān nahīñ haiñ
chhoḌo bhī ab in qissoñ ko
in qissoñ meñ jaan nahīñ hai
baat chhupānā sīkho sāhab
kis ghar meñ tūfān nahīñ hai
ab bhī terā hissa huuñ maiñ
bas tujh ko hī dhyān nahīñ hai
jab tab ḳhvāhish ug aatī haiñ
dil hai registān nahīñ hai
maiñ ik aisā afsānā huuñ
jis kā kuchh unvān nahīñ hai