aap ko chehre se bhī bīmār honā chāhiye
ishq hai to ishq kā iz.hār honā chāhiye
aap dariyā haiñ to phir is vaqt ham ḳhatre meñ haiñ
aap kashtī haiñ to ham ko paar honā chāhiye
aire-ġhaire log bhī paḌhne lage haiñ in dinoñ
aap ko aurat nahīñ aḳhbār honā chāhiye
zindagī tū kab talak dar-dar phirā.egī hameñ
TūTā-phūTā hī sahī ghar-bār honā chāhiye
apnī yādoñ se kaho ik din kī chhuTTī de mujhe
ishq ke hisse meñ bhī itvār honā chāhiye