chheḌā hai nayā naġhma hayāt-e-abadī ne

is baar tabassum na kiyā sun ke kalī ne

lafzoñ meñ utarne kā hunar siikh rahā huuñ

ḳhatre meñ haiñ alfāz ke sīnoñ meñ dafīne

vo haiñ ki bhaTakte haiñ abhī pyaas ke maare

ham haiñ ki Dubo aa.e sarāboñ meñ safīne

suntā huuñ taḌapte hue paanī kā faqat shor

hassās banāyā hai mujhe tishna-labī ne

aflāk ke manzar haiñ mire sāmne uryāñ

baḳhshī ye bulandī mujhe be-bāl-o-parī ne

shādāb nazar aate haiñ ashjār har ik samt

kyā shahr meñ jañgal kī havā laa.ī kisī ne

pahlū meñ dhaḌaktā hai taḌaptā hai shab-o-roz

bechain kiye rakkhā hai mujh ko mire jī ne

jo rāste jaate haiñ tire arsh kī jānib

vo raste bhī dikhlā.e mujhe dar-ba-darī ne