saañp sā leTā huā sunsān rasta sāmne thā
ḳhatra āġhāz-e-safar meñ ek aisā sāmne thā
dasht meñ ghamsān kā vo ran paḌā thā kuchh na pūchho
dhuup merī pusht par thī aur saayā sāmne thā
ab to un āñkhoñ ke aage ā.īna hai aur maiñ huuñ
haa.e mizhgāñ kholne se pahle kyā kyā sāmne thā
buzdil aise the bhigo paa.e na apne haath tak ham
donoñ baazū the salāmat aur dariyā sāmne thā
maiñ masāfat kī tarah thā biich meñ simTā huā sā
pusht kī jānib samundar aur sahrā sāmne thā
vasl ke ḳhvāboñ meñ ab vo raushnī baaqī nahīñ thī
hijr kī rātoñ meñ sone kā natīja sāmne thā