ishq tāsīr se naumed nahīñ
jāñ-sapārī shajar-e-bed nahīñ
saltanat dast-ba-dast aa.ī hai
jām-e-mai ḳhātam-e-jamshed nahīñ
hai tajallī tirī sāmān-e-vajūd
zarra be-partav-e-ḳhurshed nahīñ
rāz-e-māshūq na rusvā ho jaa.e
varna mar jaane meñ kuchh bhed nahīñ
gardish-e-rañg-e-tarab se Dar hai
ġham-e-mahrūmi-e-jāved nahīñ
kahte haiñ jiite haiñ ummed pe log
ham ko jiine kī bhī ummed nahīñ