dil vo jis ke ā.īne meñ aks-e-ā.inda rahā

tiira dāman manziloñ meñ bhī daraḳhshanda rahā

āh-e-āvāra kī sūrat rūh-e-gul pyāsī rahī

phuul ḳhushbū ban ke shabnam ke liye zinda rahā

haa.e vo ik muflis-o-be-ḳhānumā jo umr-bhar

sāya-e-dīvār ahl-e-zar kā bāshinda rahā

kaun ham se chhīn saktā hai mohabbat kā mizāj

pattharoñ meñ rah ke bhī ye naqsh tābinda rahā

zindagī se yuuñ to samjhauta kiyā sab ne magar

jis ne jiine kī qasam khaa.ī vahī zinda rahā

kā.enāt-o-nūr-o-zulmat hai mirā apnā vajūd

raushnī meñ bhī mirā saaya numā.inda rahā

jaane kyā kyā kah gayā us se mirā husn-e-sukūt

der tak vo mere chup rahne pe sharminda rahā

hādse to aur bhī 'tasnīm' se uljhe magar

ik tirā ġham thā jo har aalam meñ pā.inda rahā