kal shab qasam ḳhudā kī bahut Dar lagā hameñ
ik zalzala vajūd ke andar lagā hameñ
aisā na ho ki Dhañg hī uḌne kā bhuul jaa.eñ
sayyād ek din ke liye par lagā hameñ
aate dinoñ meñ terā havāla to ban sakīñ
katba banā ke qabr ke uupar lagā hameñ
us kā firāq itnā baḌā sāneha na thā
lekin ye dukh pahāḌ barābar lagā hameñ
kal ā.īnoñ ne rok ke mujh se kahā 'hasan'
kuchh din hisār-e-zāt se bāhar lagā hameñ