maiñ jitnī der tirī yaad meñ udaas rahā
bas utnī der mirā dil bhī mere paas rahā
ajab sī aag thī jaltā rahā badan saarā
tamām umr vo hoñToñ pe ban ke pyaas rahā
mujhe ye ḳhauf thā vo kuchh savāl kar degā
maiñ dekh kar bhī use us se nā-shanās rahā
tamām raat ajab intishār meñ guzrī
tasavvurāt meñ dahshat rahī hirās rahā
gale lagā ke samundar hasīn kashtī ko
sukūt-e-tīra-fazā.ī meñ bad-havās rahā
'bashīr' maiñ use kis tarha be-vafā kah duuñ
nigāh ban ke jo is dil ke aas paas rahā