jo mushkil rāste haiñ un ko yuuñ hamvār karnā hai

hameñ jazboñ kī kashtī se samundar paar karnā hai

hamāre hausle majrūh karnā chāhte haiñ vo

hameñ sūraj ke ruḳh par sāya-e-dīvār karnā hai

jo thak kar so ga.e haiñ vo to ḳhud hī jaag jā.eñge

abhī jaage hue logoñ ko bas bedār karnā hai

uThā lo haath meñ parcham mohabbat ke parastāroñ

chalo nafrat kī dīvāreñ abhī mismār karnā hai

jahālat ke añdheroñ se nimaTne ke liye 'nusrat'

charāġhoñ kā hameñ ik kārvāñ tayyār karnā hai