bikhar chukā hai ta.alluq kasāo mushkil hai

chalo haTāo ki ab rakh-rakhāv mushkil hai

lachak kī āḳhirī manzil meñ aa chukī hai shāḳh

bas aur is se ziyāda jhukāo mushkil hai

bachā ke rakkhā hai ab tak charāġh kī lau ko

magar havā hai havā par dabāo mushkil hai

hisāb-e-sūd-o-ziyāñ ho chukā ab is ke baad

koī bhī joḌ koī bhī ghaTāo mushkil hai

abhī udāsiyāñ ḳheme lagā.e baiThī haiñ

abhī to dil meñ ḳhushī kā paḌāv mushkil hai