nahīñ hai yuuñ ke damā-dam havā ne raqs kiyā
shadīd habs thā kam kam havā ne raqs kiyā
bas ek maiñ hī vahāñ par tavāf meñ to na thā
darūn-e-shahr-e-mukarram havā ne raqs kiyā
charāġh qatl huā to ḳhushī se maqtal meñ
lagā ke nāra-e-raqsam havā ne raqs kiyā
tamām din kī tamāzat ke ba.ad raat ga.e
girī jo phuul pe shabnam havā ne raqs kiyā
samundaroñ ke safar se palaT ke aa.ī to
zarā zarā sī huī nam havā ne raqs kiyā