kashish-e-husn kī ye anjuman-ārā.ī hai
saarī duniyā tire kūche meñ simaT aa.ī hai
dard ne kho.e hue dil kī jagah paa.ī hai
ik balā sar se ga.ī ek balā aa.ī hai
jaañ nisāroñ ko sahārā jo na jiine kā milā
kū-e-qātil meñ qazā khīñch ke le aa.ī hai
maiñ chhupātā huuñ ġham-e-ishq to bantā nahīñ kaam
aur kahtā huuñ to goyā mirī rusvā.ī hai
jigar o dil meñ tarāzū na ho kyuuñ nāvak-e-nāz
is ko donoñ se barābar kī shanāsā.ī hai
dil ye kahtā hai vahāñ jā ke sambhal jā.ūñgā
maiñ ye kahtā huuñ ki bad-baḳht kī maut aa.ī hai
ban ke nāseh vo ye kahte haiñ mohabbat na karo
mujh ko marne nahīñ dete ye masīhā.ī hai
sab jise dāġh-e-dil o zaḳhm-e-jigar kahte haiñ
vo mire nāḳhun-e-ġham kī chaman-ārā.ī hai
kyā hai duniyā meñ numūd aur numā.ish ke sivā
zindagī ham ko tamāshe ke liye laa.ī hai
ishq rusvā-kun-e-ālam vo hai 'ahsan' jis se
nek-nāmoñ kī bhī bad-nāmī o rusvā.ī hai