burā kahne se mujh ko mudda.ā kyā

koī pūchhe to us ne ye kahā kyā

suneñ ham bhī ki dushman ne kahā kyā

bhalā jhūTī shikāyat kā gilā kyā

mohabbat kī ye bāteñ haiñ mirī jaañ

vafā kī ibtidā kyā intihā kyā

na kiije mujh se ġhairoñ kī shikāyat

bhulā dī aap ne tarz-e-vafā kyā

sunā hai qais thā lailā kā āshiq

mohabbat ho to phir achchhā burā kyā

javānī meñ ye nādānī kī bāteñ

vo kahte haiñ ki va.ade kī vafā kyā

vafā par jaan bhī qurbāñ hai apnī

jo pūchhe ham ko us kā pūchhnā kyā

khile the us ke lab ġhunche kī sūrat

batā to do ki 'shañkar' se kahā kyā