sāvan-rut aur uḌtī purvā tere naam
dhūp-nagar se hai ye tohfa tere naam
surḳh gulāb ke saare mausam tere liye
ḳhvāboñ kā har ek darīcha tere naam
chāñd kī āñkheñ phuul kī ḳhushbū bahtī raat
qurbat kā har ek vasīla tere naam
barf meñ phailā shaam dhundalkā tere liye
har ik sub.h kā pahlā ujālā tere naam
hañstī huī sī terī āñkheñ mere liye
bahtī jhiil meñ phuul kañval kā tere naam
terī yaad kā bahtā dariyā mere liye
chāhat kā ye tanhā jazīra tere naam
duniyā-bhar meñ jitne manzar achchhe haiñ
un kā husn aur shor havā kā tere naam