parvāz meñ jo saath na de āsmān par
behtar hai ḳhaak Dāliye aisī uḌaan par
ab qurb-o-ba.ad meñ na rahā koī fāsla
duniyā simaT ke aa ga.ī mere makān par
merā harīf darpai-e-āzār hai mire
mujh ko hadaf banātā hai vahm-o-gumān par
shah-zor se kabhī nahīñ kartā muqābla
chaltā hai us kā zor faqat be-zabān par
mīzān-e-adl ko nahīñ laatā ba-rū-e-kār
kartā hai inhisār vo farzī bayān par
ye ḳhū-e-be-niyāzī hai mujh ko bahut aziiz
aa.e kabhī na harf mirī ān-bān par
jis kī nahīñ hai aaj kahīñ koī yādgār
kartā hai faḳhr vo mire nām-o-nishān par
dehlī meñ ek shā.er-e-gumnām kā kalām
'barqī' hai ab muhīt zamān-o-makān par