rah ke makkāroñ meñ makkār huī hai duniyā

mere dushman kī taraf-dār huī hai duniyā

paak dāman thī ye jab tak thī mire hujre meñ

chhoḌ ke mujh ko gunahgār huī hai duniyā

ain mumkin hai ke bad-nām mujhe bhī kar de

merī shohrat se jo bezār huī hai duniyā

tū nahīñ thā to ye raunaq bhī kahāñ thī pahle

tere aane se hī gulzār huī hai duniyā

apnī palkoñ se jhaTakte hue kuchh ḳhvāboñ ko

le ke añgḌā.iyāñ bedār huī hai duniyā

kuchh dinoñ se ye ḳhabar guuñj rahī hai 'mohsin'

ek shā.ir kī talabgār huī hai duniyā