muddat se jo band paḌā thā aaj vo kamra khol diyā
maiñ ne tere sāmne dil kā kachchā-chiTThā khol diyā
mujh se laḌne vaale saare maidāñ chhoḌ ke bhaag ga.e
le kar ik talvār jo maiñ ne apnā siina khol diyā
phuul samajh kar titlī bhañvre us pe aa kar baiTh ga.e
baaġh meñ jā kar juuñ hī us ne apnā chehra khol diyā
saare kāmoñ ko nipTā kar aadhī raat meñ soī thī
bhor bha.e phir uTh kar ammā ne darvāza khol diyā
mujh ko dekh ke merā jumla juuñ hī us ko yaad aayā
us ne jo bāñdhā thā vo bāloñ kā juuḌā khol diyā