rauñd paa.e na dalā.el mere
mere dushman bhī the qaa.el mere
saaf dikhtī thī jalan āñkhoñ meñ
phir bhī hoñToñ pe fazā.el mere
ye tahī fikr kuñ.eñ ke meñDak
ye na samjheñge masā.il mere
chhāñv dete the magar raah nahīñ
peḌ the raste meñ haa.el mere
aañkh ab ḳhvāb nahīñ de saktī
raushnī maañg le saa.il mere
jab talak haath tire haath meñ hai
hausle hoñge na zaa.il mere
us ne paas aa ke 'farīhe' bolā
gir ga.ī haath se file mere