ai mirī zaat ke sukūñ aa jā
tham na jaa.e kahīñ junūñ aa jā
raat se ek soch meñ gum huuñ
kis bahāne tujhe kahūñ aa jā
haath jis moḌ par chhuḌāyā thā
maiñ vahīñ par huuñ sar nigūñ aa jā
yaad hai surḳh phuul kā tohfa?
ho chalā vo bhī nīl-gūñ aa jā
chāñd tāroñ se kab talak āḳhir
terī bāteñ kiyā karūñ aa jā
apnī vahshat se ḳhauf aatā hai
kab se vīrāñ hai andarūñ aa jā
is se pahle ki maiñ aziyyat meñ
apnī ā.ankhoñ ko noch luuñ aa jā
dekh! maiñ yaad kar rahī huuñ tujhe
phir maiñ ye bhī na kar sakūñ aa jā