tūfāñ koī nazar meñ na dariyā ubaal par
vo kaun the jo bah ga.e parbat kī Dhaal par
karne chalī thī aql junūñ se mubāhise
patthar ke but meñ Dhal ga.ī pahle savāl par
merā ḳhayāl hai ki use bhī nahīñ sabāt
jaañ de rahā hai saarā jahāñ jis jamāl par
le chal kahīñ bhī aarzū lekin zabān de
hargiz na ḳhuun ro.egī apne ma.aal par
aise makān se to yahāñ be-makāñ bhale
hai inhisār jis kā mahz ehtimāl par
'mājid' ḳhudā ke vāste kuchh der ke liye
ro lene de akelā mujhe apne haal par