mujhe is ḳhvāb ne ik arse tak be-tāb rakkhā hai
ik ūñchī chhat hai aur chhat par koī mahtāb rakkhā hai
kisī ke vāste taaza kināroñ ko ubhārā aur
mujhe sadiyoñ purāne shauq meñ ġharqāb rakkhā hai
jazīre aur sāhil sab zamāne ke liye rakkhe
mirā saarā ilāqa us ne zer-e-āb rakkhā hai
sutūn-e-shauq par ik raushnī sī paḌ rahī hai jo
charāġh-e-ārzū koī tah-e-mehrāb rakkhā hai
kisī ko to jahāñ bhar meñ farāvāñ kar diyā us ne
mujhe kuchh soch kar is dahr meñ nāyāb rakkhā hai