nayā paimān raushan kar gayā hai
vo ātish-dān raushan kar gayā hai
koī tāq-e-nazar meñ sham.a rakh kar
dil-e-vīrān raushan kar gayā hai
ufuq par Dūbne vaalā sitārā
ka.ī imkān raushan kar gayā hai
mire kamre kā ik tārīk gosha
koī mehmān raushan kar gayā hai
mire dushman kā hai ehsān mujh par
mirī pahchān raushan kar gayā hai
bahut maddham sī thī āfāq kī lau
magar insān raushan kar gayā hai