jab mire shahr kī har shaam ne dekhā us ko

kyuuñ na phir mere dar-o-bām ne dekhā us ko

harf-dar-harf mire dil meñ utart aayā hai

mujh se pahle mire ilhām ne dekhā us ko

merī āñkhoñ ne to ik baar hī manzar dekhā

phir har ik lamha-e-dushnām ne dekhā us ko

din Dhale ḳhvāb darīche meñ utar aatā hai

jab bhī dekhā hai yahāñ shaam ne dekhā us ko

jaane kis ḳhvāb kī hairat ne jagā.e rakkhā

phir mirī hasrat-e-nākām ne dekhā us ko