koī ehsās mukammal nahīñ rahne detā
dard kā saath musalsal nahīñ rahne detā
hosh kī sard nigāhoñ se take jaatā hai
kaun hai jo mujhe pāgal nahīñ rahne detā
vaqt tūfān-e-balā-ḳhez ke gardāb meñ hai
sar pe mere mirā āñchal nahīñ rahne detā
haath phailā.ūñ to chhū letā hai jhoñke kī tarah
ek pal bhī mujhe be-kal nahīñ rahne detā
mere is shahr meñ ik aa.ina aisā hai ki jo
mujh ko us shaḳhs se ojhal nahīñ rahne detā