haram-sarā-e-nāz hai ki dar-e-gah-e-niyāz hai

nigāh-e-nīm-bāz bhī nigāh-e-nīm-bāz hai

idhar-udhar jahāñ-tahāñ majāz hī majāz hai

kahīñ kahīñ nasheb hai kahīñ kahīñ farāz hai

na tishnagī na ishtihā na hirs hai na aar hai

zabān-e-ġhaznavī pe ab ayaaz hī ayaaz hai

na mai-kade kī baat kar na but-kade kī baat kar

vahāñ bhī imtiyāz hai yahāñ bhī imtiyāz hai

bashar bashar ko dekh kar gulāb kī tarah khile

yahī mirī azaan hai yahī mirī namāz hai

vo ā.eñge nahīñ-nahīñ nahīñ-nahīñ vo ā.eñge

ye raaz raaz hī rahe dil-e-hazīñ ye raaz hai

kisī se dostī nahīñ kisī se dushmanī nahīñ

na ḳhaar se kashā-kashī na gul se sāz-bāz hai