aa.e aane ko hazāroñ ġham hazāroñ ġham ga.e

ġham ziyāda se ziyāda aa.e kam se kam ga.e

dam dilāse hausle dete masīhā dam ga.e

aa.e be-had ḳhush magar bā-dīda-e-pur-nam ga.e

ab na aanā tum pa.e bīmār-pursī dosto

ab yahī alfāz kaafī haiñ tum aa.e ham ga.e

uḌ ga.e to uḌ ga.e kāfūr kī mānind ham

jam ga.e to anjuman meñ sūrat-e-yaḳh jam ga.e

dar-ba-dar dhūnī ramāne vaale ramte ab kahāñ

dar-ba-dar dhūnī ramāne vaale ramte ram ga.e

yūrish-e-barq-o-balā meñ kab mirā dam-ḳham gayā

jal ga.ī rassī to kyā kyā us ke pech-o-ḳham ga.e

ab to apne aap meñ bhī hazrat-e-ādam nahīñ

ab to apne aap se bhī hazrat-e-ādam ga.e