ye mirā bujhtā sulagtā sin ye mere rāt-din
kis tarah kaTte bhalā tujh bin ye mere rāt-din
biite sāvan kah rahe haiñ ye chhamā-chham the kabhī
ab to haiñ goyā faqat kin-min ye mere rāt-din
maiñ ne armānoñ kā pahlā raqs dekhā thā jahāñ
kaash ho jaate vahīñ sākin ye mere rāt-din
DhūñDh laate haiñ hamesha mere jurmoñ kā javāz
ye mire sab se baḌe mohsin ye mere rāt-din
tū samajhtā hai judā ḳhud ko agar mujh se to phir
saiñkaḌoñ se zarb de kar gin ye mere rāt-din
Dar rahā huuñ umr kī nā-pā.edārī se 'qatīl'
vaqt ke hāthoñ na jaa.eñ chhin ye mere rāt-din