titliyoñ kā rañg ho yā jhūmte bādal kā rañg
ham ne har ik rañg ko jaanā tire āñchal kā rañg
terī āñkhoñ kī chamak hai yā sitāroñ kī ziyā
raat kā hai ghup añdherā yā tire kājal kā rañg
dhaḌkanoñ ke taal par vo haal apne dil kā hai
jaise gorī ke thirakte paañv meñ paa.el kā rañg
pheñknā tum soch kar lafzoñ kā ye kaḌvā gulāl
phail jaatā hai kabhī sadiyoñ pe bhī ik pal kā rañg
aah ye rañgīn mausam ḳhuun kī barsāt kā
chhā rahā hai aql par jazbāt kī halchal kā rañg
ab to shabnam kā har ik motī hai kañkar kī tarah
haañ usī gulshan pe chhāyā thā kabhī maḳhmal kā rañg
phir rahe haiñ log hāthoñ meñ liye ḳhanjar khule
kūche kūche meñ ab aatā hai nazar maqtal kā rañg
chaar jānib jis kī ra.anā.ī ke charche haiñ 'qatīl'
jaane kab dekheñge ham us aane vaalī kal kā rañg