rāste yaad nahīñ rāh-numā yaad nahīñ
ab mujhe kuchh tirī galiyoñ ke sivā yaad nahīñ
phir ḳhayāloñ meñ vo biite hue sāvan aa.e
lekin ab tujh ko papīhe kī sadā yaad nahīñ
ek va.ada thā jo shīshe kī tarah TuuT gayā
hādisa kab ye huā kaise huā yaad nahīñ
ham diyā karte the aġhyār ko ta.ana jin kā
ab to ham ko bhī vo ādāb-e-vafā yaad nahīñ
vaz.a-dārī se hai majbūr mirā pyaar 'qatīl'
sab purāne haiñ koī daaġh nayā yaad nahīñ